ប៉ះសេមិនតម្រូវថាត្រូវចេះឆ្វេងឬស្ដាំឡើយ អ្វីដែលសំខាន់អ្នកនោះឯង ត្រូវមានភាពឆ្លាតវៃ លើកបាល់ស្អាតល្អ ដាច់បាំងល្អ ចេះកែបាល់ខូច ជាពិសេសត្រូវយល់ចិត្តស្មាត់ទាំងអស់ ដើម្បីឱ្យពួកគេវៃផ្ដាច់យកពិន្ទុ។ ទោះបីជាយ៉ាងណា មានសំណួរមួយត្រូវបានចោទសួរថា តើអ្នកប៉ះសេចេះដៃស្ដាំនិងដៃឆ្វេង ម្នាក់ណាចំណេញជាង?
លោកគ្រូ សោម ណារិទ្ធ (សើច) និងគ្រូធំ ចំណាន
បើតាមលោកគ្រូបង្វឹកបាល់ទះ របស់ក្លឹបស្នងការនគរបាលរាជធានីភ្នំពេញ ក្នុងចំណោមអ្នកទាំងពីរនេះ អ្នកប៉ះសេចេះដៃឆ្វេងចំណេញជាងអ្នកប៉ះសេចេះដៃស្ដាំ ដ្បិតគេអាចមានអេឡង់អវៃបាល់ពីរប៉ះបានល្អ។
អតីតជម្រើសជាតិបាល់ទះលើក្ដារ និងឆ្នេរខ្សាច់វ័យ៤៣ឆ្នាំ បានពន្យល់យ៉ាងដូច្នេះថា ៖”ប៉ះសេឆ្វេងវាចំណេញ ពេលដែលបាល់គងវីឡេអីយើងអាចវៃបាន វៃពីរពីរប៉ះសេ តែជំនាញនេះមិនសូវមានច្រើនទេស្រុកខ្មែរ»។
ការលើកឡើងខាងលើនេះដោយសារតែលោកគ្រូ សោម ណារិទ្ធ ដែលចេះប្រើដៃឆ្វេងយ៉ាងស្ទាត់ជំនាញ ក៏ធ្លាប់ជាស្មាត់និងជាអ្នកប៉ះសេ កាលជំនាន់លោកនៅអាចលេងបាន ហើយការវៃបាល់ពីរប៉ះរបស់លោក គឺមានប្រសិទ្ធភាពខ្ពស់ ហើយថែមទាំងវៃចូលមុខគូប្រជែងទៀតផង។ នេះបើតាមការបញ្ជាក់ពីលោកគ្រូ សោម ណារិទ្ធ។
បច្ចុប្បន្នអ្នកប៉ះសេដែលជំនាញដៃឆ្វេងមានពីររូបគឺកីឡាករ សួន ចាន់ណារ៉ូ របស់ក្លឹបបាល់ទះវិសាខា និង ប៊ន ណារិទ្ធ កីឡាកររបស់ក្លឹបបាល់ទះក្រសួងមហាផ្ទៃ។
សួន ចាន់ណារ៉ូ អ្នកប៉ះសេជំនាញដៃឆ្វេងរបស់ក្លឹបបាល់ទះវិសាខា
ទស្សនាវីដេអូលោកគ្រូ សោម ណារិទ្ធ វៃបាល់ពីរប៉ះនៅនាទីទី ៩ និង ៣៩ វិនាទី។
វីដេអូនេះជាការប្រកួតរវាងក្រុមនគរបាលកម្ពុជា និងក្រុមនគរបាលហ្វីលីពីន ក្នុងពានរង្វាន់អាស៊ានប៉ូលិស ក្នុងទីក្រុងហាណូយប្រទេសវៀតណាម ឆ្នាំ២០០៥។ លោកគ្រូសោម ណារិទ្ធ ពាក់អាវលេខ៩ លេងក្នុងតំណែងប៉ះសេ ហើយក្នុងនោះក៏មានលោកគ្រូ សោម ចំណាប់ ជាប្អូនបង្កើតពាក់លេខ៧ និងលោកគ្រូ ឆាត របស់ក្រសួងមហាផ្ទៃជាដើម៕